20 de abril de 2025

Огласительное Слово свят. Іоанна Златоустаго.

Аще кто благочестивъ и боголюбивъ, да насладится сего добраго и свѣтлаго торжества. Аще кто рабъ благоразумный, да внидетъ, радуяся, въ радость Господа своего. Аще кто потрудися постяся, да воспріиметъ нынѣ динарій. Аще кто отъ перваго часа дѣлалъ есть, да пріиметъ днесь праведный долгъ. Аще кто по третіемъ часѣ пріидѣ, благодаря да празднуетъ. Аще кто по шестомъ часѣ достижѣ, ничтожѣ да сумнится; ибо ничимъ отщетевается. Аще кто лишися и девятаго часа, да приступитъ, ничтоже сумняся, ничтоже бояся. Аще кто точію достиже и во единонадесятый часъ, да не устрашится замедленія: любочестивъ бо Сый Владыка, пріемлетъ послѣдняго, якожѣ и перваго: упокоеваетъ въ единонадесятый часъ пришедшаго, якожѣ дѣлавшаго отъ перваго часа; и послѣдняго милуетъ, и первому угождаетъ, и оному даетъ, и сему дарствуетъ; и дѣла пріемлетъ, и намѣреніе цѣлуетъ; и дѣяніе почитаетъ, и предложеніе хвалитъ. Темже убо внидите вси въ радость Господа своего: и первіи, и вторіи, мзду пріимите. Богатіи и убозіи, другъ со другомъ ликуйте. Воздержницы и лѣнивіи, день почтите. Постившійся и не постившійся, возвеселитеся днесь. Трапеза исполнена, насладитеся вси. Телецъ упитанный, никтоже да изыдетъ алчай; вси насладитеся пира вѣры; вси воспріимите богатство благости. Никтоже да рыдаетъ убожества: явися бо общѣе Царство. Никтоже да плачетъ прегрѣшеній, прощеніе бо отъ гроба возсія. Никтоже да убоится смерти, свободи бо насъ Спасова смерть. Угаси ю, Иже отъ нея держимый. Плѣни ада, Сошедый во адъ. Огорчи ада, вкусивша плоти его. И сіе предпріемый Исаіа возопи: адъ, глаголетъ, огорчися, срѣтъ Тя доле. Огорчися, ибо упразднися, огорчися, ибо поруганъ бысть. Огорчися, ибо умертвися. Огорчися, ибо низложися. Огорчися, ибо связася. Пріятъ тѣло, и Богу приразися. Пріятъ землю и срѣте небо. Пріятъ, еже видяше, и впаде во ежѣ не видяшѣ. Гдѣ твое, смерте, жало? Гдѣ твоя, аде, побѣда? Воскресе Христосъ, и ты низверглся еси. Воскресе Христосъ, и падоша демони. Воскресе Христосъ, и радуются Ангели. Воскресе Христосъ, и жизнь жительствуетъ. Воскресе Христосъ, и мертвый ни единъ во гробѣ. Христосъ бо, воставъ отъ мертвыхъ, Начатокъ усопшихъ бысть. Тому слава и держава во вѣки вѣковъ. Аминь.